නුඹලාගේ කාලය අවසන්ය

gjb
මුළු සේසතම රැජිනට දුන් මිනිස්සු
October 6, 2017
hgjkgf
2008 ආර්ථීක අවපාතය වසන් කරන ව්‍යාජ යහපාලනය
October 6, 2017
Show all

නුඹලාගේ කාලය අවසන්ය

yjdf

ඔක්: 25දා රාත්‍රියේ ඇරඹි දෙවන සමස්ත රුසියානු සෝවියට් සභා සම්මේලනයට පැමි‚ නියෝජිතයන් 649න් අඩක් පමණ බොල්ෂෙවිකයෝ වූහ. 82ක් වූ මෙන්ෂෙවික් නියෝජිතයන්ගෙන් 14ක් මාටෝව්ගේ නායකත්වයෙන් වූ වඩාත් වාමාංශික නැඹුරුවක් සහිත මෙන්ෂෙවික් ජාත්‍යන්තරවාදියෝ වූහ. 160ක් වූ සමාජවාදී විප්ලවවාදීන්ගෙන් අඩක් පමණ බොල්ෂෙවික් පක්ෂයට කොන්දේසි සහිතව සහයෝගය දුන් වාම සමාජවාදී විප්ලවවාදියෝ වූහ. මේ අතර නිර්පාක්ෂිකව පැමි‚ ඇතැම් නියෝජිතයෝද සම්මේලනයේදී බොල්ෂෙවික් ලේඛනයේ ලියාපදිංචි වූහ. එබැවින් බොල්ෂෙවිකයන් සම්මේලනයේ බහුතරය විය.
පළමු සෝවියට් සභාවේදී පත්කර ගත් විධායක සභාව වෙනුවෙන් මෙන්ෂෙවික් පාක්ෂික ඩෑන් විසින් ප:ව: 10.40ට සමුළුව විවෘත කරන ලදී. ඒ සමගම බොල්ෂෙවිකයකු වූ වී.ඒ. ඇවන්සෝව් සමුළුවේ සභාපති මණ්ඩලය ඒ ඒ පක්ෂ නියෝජිත සංඛ්‍යාවට සමානුපාතිකව තෝරා ගතයුතු යැයි යෝජනා කළ ද මෙන්ෂෙවිකයන් සහ සමාජවාදී විප්ලවවාදීන් කියා සිටියේ තමන් සභාපති මඩුල්ල සඳහා ඉදිරිපත් නොවන බවයි. ඒ අනුව සභාපති ම~ුල්ලට පත්වූවෝ 7දෙනාම බොල්ෂෙවිකයෝ වූහ.
සම්මේලනය නියෝජනය කරන සියලු පක්ෂ එක්වී සභාගී සෝවියට් රජයක් පිහිටුවිය යුතුය යනුවෙන් මාටොව් ඉදිරිපත් කළ යෝජනාවට නැගුණු ඔල්වරසන් හඬින් එයට නියෝජිතයන්ගේ මහත් අනුග්‍රහයක් හිමිවන ලකුණු පළවිය. එහෙත් ඒ සමගම නැගී සිටි සමාජවාදී විප්ලවවාදී දක්ෂිණාංශික කණ්ඩායමේ වී.වයි. ගුට්විච් කියා සිටියේ තම සහෝදර ඇමතිවරු මේ මොහොතේ ශීත මාළිඟය තුළ කාලතුවක්කු වෙඩි ප්‍රහාරයට මුහුණ දෙමින් සිටින බවය. මේ සමුළුව නියෝජනය කරන පක්ෂයක ආධාරකරුවන් ඒ අපරාධය සිදුකරන විට මේ සමුළුවේ රැඳී සිටිමින් අපටත් ඒ අපරාධයට හවුල්විය නොහැකි බව ඔහු පැවසීය. (මේ වන විට ශීත මාළිගයට යාමට ගොස් ආපසු හරවා යවන ලද පෙළපාළිකරුවන් නාගරික ඩූමාව තුළ ‘පෙත්රොග්‍රාදය ගලවා ගැනීමේ කොමිටිය’ පිහිටුවමින් සිටියහ.) තම කණ්ඩායම ගැලවීමේ කොමිටිය හා එක්වී අපරාධකරුවන්ගේ තුවක්කු උණ්ඩයට මුහුණ දීමට සූදානම්ව මේ සම්මේලනයෙන් පිටව යන බව ගුඩ්විච් ප්‍රකාශ කෙළේය. ජෝන් රීඩ් මෙසේ සටහන් කරයි.
‘ඊළඟට කතා කළ කින්චුක් නැමති හමුදා නිලධාරියා මෙසේ පැවසීය. මම ඉදිරි හමුදා පෙරමුණේ නියෝජිතයන් වෙනුවෙන් කතා කරමි. ව්‍යවස්ථාදායක මණ්ඩලය රැස්වීමට සති තුනක් පමණක් තිඛෙන මේ අවස්ථාවේදී සෝවියට් සම්මේලනයක් අවශ්‍ය යයි හමුදාව කල්පනා නොකරයි. සාධාරණව සිතන සියළු හමුදා සෙබළුන්ට මේ කොංග්‍රසය හැර යන ලෙස මම ආයාචනා කරමි. ඉනික්බිති ඔහුට එරෙහිව නගන ලද ඝෝෂාව නිසා කට හඩ වැඩිකළ හෙතෙම සමුළුව හැර යන ලෙස වූ මෙන්ෂෙවික් ප්‍රකාශනය කියවන්නට පටන් ගත්තේය. ඉන්පසු අක්‍රෝෂ පරිභව හා හූ හඩ මධ්‍යයේ ඔවුන්ගේ පිටව යාම සිදුවිය. එම පිටව යාම එම පක්ෂ තුළ පවා විරෝධයට ලක්විය.’ මේ හැරයාම පිළිබඳව මෙන්ෂෙවික් පාක්ෂික සුකනොව් 1921දී මෙසේ ලියයි. ‘අපි විප්ලවයේ මුළු පිටියම බොල්ෂෙවිකයන්ට පවරා දෙමින් පිටියෙන් ඉවත්වූයෙමු. එක්සත් ප්‍රජාතන්ත්‍රවාදී ආණ්ඩුවක් වෙනුවෙන් කොංග්‍රසය තුළ සිට ක්‍රියාත්මකවී නම් යම් ප්‍රයෝජනයක් අත්කර ගත හැකිව තිබිණි. එහෙත් අප ගත් කොංග්‍රසය හැර යාමේ අඥාන තීරණය මගින් බොල්ෂෙවිකයන් වෙත ජනතාවගේ සහ විප්ලවයේ ඒකාධිකාරී අයිතිය පවරා දුන්නෙමු.
ඉක්බිති මාටොව් තම සභාග ආණ්ඩු යෝජනාව වෙනුවෙන් අවසන් ප්‍රයත්නයත් දරනු ලැබීය. එවර ඔහු යෝජනා කෙළේ සෝවියට් රජයක් පිහිටුවීම පිණිස සම්මේලනය හැර ගියවුන් සමඟ (සෙසු සමාජවාදී පක්ෂ සමඟ) සාකච්ඡා කිරීමට නියෝජිත පිරිසක් පත්කර ගතයුතු බවය. මෙන්ෂෙවිකයන් හා සමාජවාදී විප්ලවවාදීන් සම්මේලනය හැර යාමෙන් ඔවුන් කඩාකප්පල්කාරීන් යයි ද ප්‍රතිවිප්ලවවාදීන්යයි ද හැඟීමක් සම්මේලනය තුළ හටගෙන තිබුණු අතර ට්‍රොට්ස්කි නැගී සිට තම පැර‚ නායකයා වූ මාටොව්ට මෙසේ පිළිතුරු දෙන්නට විය. ‘ජනතාව අපගේ බැනරය යටතේ එක් රොක් වූවාහුය. දැන් අපි කැරැල්ල ජයග්‍රහණය කර ඇත්තෙමු. ජයග්‍රහණය ප්‍රතික්ෂේප කර සම්මුතියකට එන්නැයි දැන් අපට කියති. කා සමඟද? අප හැරගිය අර කාලකණ්ණි කණ්ඩායම් සමඟය. නැතහොත් ඔවුන් සමඟ එක්වන්නැයි කියන්නන් සමගය. රුසියාවේ කිසිවෙක් දැන් ඔවුන් සමඟ නොසිටී. සම්මුතියක් ඇතිකර ගත හැක්කේ සමාන පාර්ශ්වයන් දෙකක් අතරය. එවැනි පාර්ශ්ව දෙකක් නැති බැවින් සම්මුති ඇතිකර ගැනීමක් පිළිබඳව දැන් සලකා බැලිය නොහැකිය. අප හැරගියවුන්ටද, අපට අරහෙම – මෙහෙම කරන්නැයි කියන්නන්ටද මම මෙසේ කියමි. මූසල බංකොලොත්කාරයන් වන නුඹලාගේ කාලය දැන් අවසන්ය. නුඹලා දැන් නුඹලාට හිමිතැනට යා යුතුය. ඒ ඉතිහාසයේ කුණු කූඩයටය.’ පිළිතුර නිමවීමෙන් පසුත් මොහොතක් වික්ෂිප්තව සිටි මාටොව් එහෙනම් අපි යන්නම් යි හඩ නඟා පවසා පුටු පේළි අතරින් දොරටුව දෙසට ගමන් කරන්නට විය. අපි හිතුවේ ඔබවත් ඉඳියි කියලා’යි එසේ යන මාටෝව් ඉදිරියට පැමිණි බොල්ෂෙවිකයෙක් පැවසීය. ඒ ප්‍රකාශයෙන් සැළුනු මාටොව් ඔහු දෙස මද වේලාවක් බලා සිට ඔබ කරන ඔය අපරාධය කවදාහරි ඔබට තේරුම්යාවි යයි පවසා නිහඩව පිටව ගියේය. ඒ ඔහුගේ දේශපාලන ජීවිතයේ අවසන් ජවනිකාව විය.
ඔක්: 25දා පෙරවරුවේ සිට නැවත නැවතත් කල් දමන්නට සිදුවූ ආණ්ඩුව සිර භාරයට ගැනීමේ ප්‍රයත්නය අන්තිමේදී 26දා පාන්දර 2 පසුවී මද වේලාවක් ගතවන විට සාක්ෂාත් කර ගැනීමට හැකිවිය. ඒ අවස්ථාවේ අත් අඩංගුවට පත්වූ අධිකරණ ඇමති මලියාන්තොවිච් ඒ සිද්ධිය මෙසේ සටහන් කරයි.
‘එක්වරම කිසියම් දිසාවකින් ශබ්දයක් නැගුණු අතර එය ක්‍රමයෙන් වැඩිවී ආසන්නයටම පැමිණියේය. මෙම ශබ්ද මෙතෙක් පැමි‚ ඒවාට වෙනස් බවක් උසුලන බව අපට ඉවෙන් මෙන් දැනෙන්නට විය. අවසානය අත ළඟ බව මා හට ප්‍රත්‍යක්ෂ විය. දොර විවර විය. මිලිටරි කැඩෙට් භටයෙක් දිවවිත් සීරුවෙන් සිට ආචාර දැක්වූයේය. මාළිගය අත්පත් කරගෙන, සියලූම දොරටු අවහිර කරලා, හැමදෙනාම යටත්වෙලා , තවමත් ආරක්ෂාව යටතේ තියෙන්නේ මේ කාමරය පමණයි, අන්තර්වාර රජයේ නියෝගය කුමක්ද? අප පිළිපැදීමට සූදානම් ඔහු පැවසීය. ඔවුන්ට කියන්න අපට ලේ වැගිරීමක් උවමනා නෑ කියා, අප යටත් වෙනවා කියා. කිෂ්කින් (කෙරෙන්ස්කි වෙනුවට පැය කිහිපයකට පෙර පත්කර ගත් නායකයා) පැවසීය. කැඩෙට් භටයා පිටවී ගොස් ස්වල්ප වේලාවකින් පසුව දොරට පිටුපසින් ආ විශාල ශබ්දයක් සමඟ දොර විවෘත විය. මුහුදු රැල්ලට ලී පතුරක් ගසාගෙන එන්නාක් මෙන් කුඩා මිනිසෙක් කාමරය තුළට තල්ලුවී ආයේය. ඔහු පසුපසින් විශාල පිරිසක් කාමරය ඇතුළට කඩාවැදී අස්සක් මුල්ලක් නෑර පැතිර ගියේ මහ ජල කඳක් මෙනි. විඩාපත් මුහු‚න් යුතුව කාමරය ඇතුළට විසිවෙන්නාක් මෙන් ආ කුඩා මිනිසා තියුණු හා විධානාත්මක ස්වරයෙන් කථා කෙළේය. අන්තර්වාර රජයේ සාමාජිකයන් කොහිද? අන්තර්වාර රජය මෙහි තිඛෙනවා, කොනොව්ලොව් අසුනක හිඳගෙනම පිළිතුරු දුන්නේය. ඔබ බලාපොරොත්තු වෙන්නේ මොනවාද?
මම ඔබට දැනුම් දෙනවා අන්තර්වාර රජයේ සාමාජිකයන් වන ඔබ සැම දැන් අත් අඩංගුවේ බව, මම ඇන්ටනොව් ඔව්සෙන්කෝ, විප්ලවීය හමුදා කමිටුවේ සභාපති. ලේ වැගිරීමක් වැලැක්වීමට අන්තර්වාර රජයේ සාමාජිකයන් යටත් වෙනවා, කොනොව්ලොව් කියා සිටියේය. ලේ වැගිරීමක් වැලැක්වීමට! උඹලා කොතරම් ලේ වගුරුවා තිඛෙනවාද? පිරිසෙන් එකෙක් කෑ ගැසීය. කෙරෙන්ස්කි නොමැති බව දැනගත් විට කෝපාවිශ්ෂ්ට ඝෝෂාවක් පිරිස තුළින් මතුවිය. මුනුත් පැනල යාවි, වෙඩි තියමු… නෑ සහෝදරවරුනි, බයිනෙත්තු වලින් අනිමු, වැඩේ කෙටි කරමු! එවිට ඇන්ටනොව් ඔව්සෙන්කෝ හිස ඔසවා තියුණු හඬින් කතා කෙළේය. සහෝදරවරුනි, සංසුන් වෙන්න, පීටර් පෝල් බලකොටුවේ ඔවුන්ව සිරගත කරනවා, ප්‍රචණ්ඩත්වයට මා ඉඩ දෙන්නේ නෑ, සංසුන්ව හැසිරීමට වග බලාගන්න, නීතිය රකින්න, දැන් බලය තිඛෙන්නේ ඔබගේ අතේ, ඔබලා නීතිය රැකිය යුතුයි.
එලෙස අන්තිමේදී අන්තර්වාර රජය අවසන් වී පෙත්රොග්‍රාද්හි බලය බොල්ෂෙවිකයන් සතුවිය. එසේ බලය සතුකරගනු ලැබුවේ ආයුධ සන්නද්ධ නැගී සිටීමකින් නමුත්, ඒ ආයුධ වලින් නැගී වෙඩි හඩ ඇසුණු නමුත් ඒ වෙඩි වැදී මළවුන් ගැන බොහෝ කතා ද පැතුරුනු නමුත් වෙඩි වැදුණු කෙනෙක් නොවීය. සුප්‍රසිද්ධ අවුරෝරා යුද නැවෙන් තබන ලද කාලතුවක්කු වෙඩිද පුහු වෙඩි පමණක් විය. එම නැවේ අණදෙන්නා ලෙස කටයුතු කළ බොල්ෂෙවික් කොමිසාර්වරයා මෙසේ සටහන් කරයි. සවස් වන විට විප්ලවීය හමුදා කමිටුවෙන් අප වෙත තවත් නියෝගයක් ලැබුණු. ඉන් කියවුණේ පීටර් පෝල් බලකොටුවෙන් සංඥා ලද විගස පුස් වෙඩි කිහිපයක් පත්තු කරන ලෙසත් දැනුම් දෙනු ලැබුවොත් ෂෙල් වෙඩි ප්‍රහාරයක් ශීත මාලිගයට එල්ල කරන ලෙසත්ය. එහෙත් මාලිගය ඉක්මනින් යටත් වූ බැවින් ෂෙල් වෙඩි ප්‍රහාරය එල්ල කිරීමට අවශ්‍ය නොවීය. මළවුන් ගැන පැතිරුණු කතා පිළිබඳව ජෝන් රීඩ්ගේ සටහනක් මෙසේය. ‘යුන්කර් භටයන් සියල්ලන්ම නිරායුධ කොට මරා දැමුණු බවත්, කාන්තා සෙබළියන් දූෂණය කළ බවත්, ඇතැමුන් ඒවා ඉවසාගත නොහැකිව දිවි නසාගත් බවත්, ප්‍රචාරය විය. මියගියවුන්ගේ නම් ලැයිස්තු පවා ප්‍රකාශයට පත්විය. බියට පත් නෑසියෝ රාත්‍රියේ ඩූමාව කරා දිව යන්නට වුහ. ටුමානොව් කුමාරයාගේ සිද්ධිය කතා වල ස්වාභාවය පිළිබද උදාහරණයක් ලෙස දැක්විය හැකිය. ඔහුගේ සිරුර මොයිකා ඇලේ පාවෙමින් තිඛෙන බව දැන ගන්නට ලැබිණි. එහෙත් පවුලේ උදවිය විසින් ඔහු නොමළ බවත් අත් අඩංගුවේ පසුවන බවත් දන්වන ලදී. ඉන්පසු ඒ සිරුර ජනරාල් ඩෙනිසමෝගේ බව ප්‍රකාශ විය. එහෙත් ජෙනරාල් ඩෙනිසමෝ ද ජීවත්ව සිටියේය. සොයාගෙන යනවිට දැනගන්නට ලැබුණේ මොයිකා ඇලේ මළ සිරුරක් පා නොවූ බවය.’
පැය 25ක් පමණ කාලයක් තිස්සේ පැවති සන්නද්ධ නැගිටීමේදී කිසිදු ලේ සෙලවීමක් පවා වාර්තා වී නොමැත. ශීත මාළිගය යටත් කරගෙන පැයකින් පමණ පසු යුද අමාත්‍යාංශය හා මොගිලෙව්හි පිහිටි ස්ටැව්කා හමුදා මූලස්ථානය අතර සිදුවූ ටෙලෙක්ස් සංවාදයක් මගින් එදින වාතාවරණය තවදුරටත් පැහැදිලි කරයි.
මොගිලෙව් හමුදා ප්‍රධාන කාර්යාලය (ස්ටැව්කා): මේ මොහොතේ පෙත්රොග්‍රාද්හි පවතින තත්ත්වය පිළිබඳ අපට ප්‍රකාශයක් ලබාදිය හැකිද?
යුද කටයුතු අමාත්‍යාංශය : තත්ත්වය පහත සඳහන් පරිදිය. නෙව්ස්කි වීදිය, මොයිකා දක්වා රථවාහන සඳහා විවෘතව පවතී. එහෙත් මොයිකා සිට මාළිගය දක්වා කොටස නාවිකයන් විසින් අත්පත් කරගෙන ඇත. අනෙකුත් සියලුම මාර්ග විවෘතව ඇත. දුම්රිය ස්ථාන කැරලිකරුවන් විසින් අල්ලාගෙන ඇත. වීදිවල මුර සංචාරයෙහි යෙදෙන ඔවුහු තමන්ට පිළිගත හැකි බල කඩදාසි නොමැති අය අත් අඩංගුවට ගනිති. ස්මොල්නි ගොඩනැගිල්ල අවට සන්නද්ධ රථ මුර සේවයේ යොදවා ඇත. වීදිවල සාමාන්‍යයෙන් නිහඩතාවයක් පවතී. අද දිනය කිසිදු ප්‍රචණ්ඩ සිද්ධියකින් තොරව ගෙවී ගියේය. සාමාන්‍ය පිරිස් සිදුවන දේ ගැන කිසිදු හැඟීමක් නොදැක්වීම විශ්මය ජනකය. නාගරික ඩූමාවෙහි විප්ලව සුරැකීමේ කමිටුවක් රැස්වෙමින් සිටී. එය සෝවියට් සම්මේලනයෙන් කැඩී වෙන්වී පැමිණි පැරණි සෝවියට් විධායක සභාවෙන් හා ඩූමා නියෝජිතයන්ගෙන් සමන්විතයි. කැරලිකරුවන් විසින් නගරයේ සාමය රකින අතර ප්‍රචණ්ඩත්වයක් හෝ සාමය කඩවීමක් වාර්තා නොවේ. විප්ලවය සුරැකීමේ කමිටුවට මේ වන විට කිසිදු හමුදා බලයක් නොමැති අතර ඔව්හු යුද පෙරමුණේ සිට පැමිණෙන හමුදා මත තම අපේක්ෂා රඳවාගෙන සිටිති. ආරම්භයේදී කැරලිකරුවන් කිසිදු අධිෂ්ඨාන සහගත බවක් පෙන්නුම් නොකළ නමුදු පසුව ප්‍රතිරෝධයන් දුටු විට….. (මෙම වාක්‍ය අවසන් කර නොතිබි‚)
ස්ටැව්කා: දැන් අන්තර්වාර රජය කොහිද?
යුද අමාත්‍යාංශය: පැයකට පමණ පෙර ඔවුන් ශීත මාළිගයේ සිටියා. දැන් ඔවුන් අත්අඩංගුවේ.


චන්ද්‍රසේන බදුගම